බුර්කාව තහනම් කිරීමට අදාළ නියෝගය සහිත කැබිනට් පත්‍රිකාවට තමා අත්සන් තැබු බව මහජන ආරක්ෂක අමාත්‍ය රියර් අද්මිරාල් ආචාර්ය සරත් වීරසේකර මහතා ප්‍රකාශ කරයි.
ඒ මහතා මේ බව ප්‍රකාශ කළේ අද (13) කළුතර මුණසිංහ ආරාමයේ පැවති උත්සවයක් අමතමිනි.
අමාත්‍යවරයා වැඩිදුරටත් ප්‍රකාශ කළේ, මෙරට ජාතික ආරක්ෂාවට බුර්කාව ඍජුව බලපානු ලබන බවයි.
“ අපි දන්නවා අපි පුංචි කාලයේ දීත් ඕන තරම් මුස්ලිම් යාළුවෝ හිටියා. මුස්ලිම් ගැහැණු දරුවෝ බුර්කාව පැළඳගෙන හිටියේ නෑ. ඒක ඊයේ පෙරේදා ආපු ආගමික අන්තවාදී සංකේතයක්.ඒක අනිවාර්යෙන්ම තහනම් කරනවා. ඒ වගේම තමයි මද්‍රසා පාසල්. මෙරට මද්‍රසා පාසල් තියෙනවා 2000කට වැඩි ප්‍රමාණයක්. අපි කාටවත් පුළුවන්කමක් නෑ පාසලක් විවෘත කරලා ඕන ඕන දේවල් ළමයින්ට උගන්වන්න. අවුරුදු 5 සිට 16 දක්වා සියලුම දරුවෝ මේ රටේ ඉපදෙන ජාතික අධ්‍යාපන ප්‍රතිපත්තියක් අනුව තමයි අධ්‍යාපනය ලබන්න ඕනේ. ඒ නිසා එහෙම ජාතික අධ්‍යාපනයක් අනුව ලියාපදිංචි නොවුණ 1000කට වඩා තියෙන මද්‍රසා පාසල් තහනම් කරන්නත් අපි හෙට අනිද්දා කටයුතු කරනවා. “ – යැයි එම උත්සවය අමතමින් අමාත්‍යවරයා කියා සිටියේ ය.
